OTOČAC – Eto, jutroske čvika, ni baš na prava, već (po)četnička, mogli bi reć. Al more, more se dogodit i na prava, a to je unda kada se kvaka na vrati lipi za prste. Unda je to prava čvika. Kase cakla na puneštrami zaledidu i sve po njimi striž na prst debela. Unda je to prava čvika. Kad iz aborta prije izajdeš neg ujdeš. Unda je to prava čvika. Kase led u kablici vode u prvoj kući razbijal bradvon, unda je to prava čvika. Kase nosnice od studeni lipidu i ne moreš puvat, i to je unda prava čvika. Tako se to negda mirilo, ni bilo Sjekovića i takovi. Ni bilo portalov, ni bilo panike, ni bilo voga čuda čin se danaske narod plaši. Velidu da ima još nekoliko dani za pravu čviku. More bit, kase nebo zamodri, e unda će drugu noć bit čvika da uši otpadadu. A kad bude ta najjača, prepuknuće, vrime će se prominit. To i sami znamo, i bez Sjerkovića.
Eto, jutroske u Otošcu nabroilo -12. Puše i malo burice, nosi snig, ma jopet konda ni tako jako studeno, da se durat. Neki velidu da je bilo studenije kad je bilo -2 i kad je bila velika vlaga. More bit, taj osićaj studeni, to ti je kaj – ljubav, nekoga uvati, nekoga ne, kako kod koga. Tako je i s čvikon, nu.
I.B.
PRINT