KRASNO – Ma ki njimi ča more? Ma niki! – more se čut po gradu. A o komu je beseda? Pa o Gačanskin konopašicami, mi domaći ljudi bi rekli Gačanskimi oprtašicami. Jerbo ki je vrag negda imal „konop“, ma niki, babe su od oljmin i pazdira plele oprte i to ti je bilo to. Al pušćimo mi oprte i konope, Gačanske konopašice su bitne. Došle i pobedile, gotovo pa u svemu, za ne verovat. Aha, borme je tako. Kadi? U Krasnu (ne u Krasnomu – kako neki neoprezno rečedu).
Trebalo je to bit još za krasnarsku Antonju, kako uni velidu za zbor sv. Ante, al ljivala kiša kaj munjena pa se odustalo. I pravo narod imal, valjda bi vratar po kiši tamo bil i potezal se. I rekli da će se to malkicu pomaknut za lipše vrime, a toga lipšega vrimena ni pa ni. Neki su klimali glavami – alaaa, tako se to reče, al eto, narod od besede i borme ve prošle subote se to dogodilo.
A Gačanske konopašice se prijavile u sve discipline, potezanje štrika, piljenje trupca, umićanje (neki velidu da „kamena s ramena“, ljudi privatili nešto iz susedni jezikov, čaš), svega osin dičji igar. Nisu tile đikat u vrićami, ma i kakojdu kasu nako krupne, količke bi to vriće trebale za nji, trebale bi vriće od tlaka, al ki to više ima, ma niki.
U štriku velidu da su nategle Kuterevke, edva, al da esu. U tomu da su in pomogle kuterevke coklje, guma poletila i bub na leđa. I da su edva pretegle jerbo su se neke od Gačanski konopašic previš „pripravile“ pa da in je i slama pala u noge. Je da une „treniradu“ u nekin disciplinami, al jopet, jopet, ni se za sramotit pred sviton. I u umićanju su bile samo takove, frcal je kamen konda ga baca sama Ivana Brkljačić ili Sandra Perković. Tote velidu da su pobrale sve ča se moglo pobrat. Al u pili, e tote su bile tanke, ni to naučno pilit, ma da. Ni to ni imalo prilike pilit trupce, drva se kupidu gotova, ma i iscipana, pa ki vratar više pili.
Na kraju su se Gačanske konopašice natezale na štriku s muškima iz Senja, iz njeve udruge. Kaj pretegle une i nji, a čajdu, dečki i pušćali, da in volju ne ubijedu. Sve u svemu u Krasnu je to dobro prošli o smirilo, istina i Bog, ni bilo prejake konkurencije, ni se tote za uljuljkat i vikat „vidi nas!“, valja zapet ako se oće ča šire uspit.
Kako nan je kazala njeva frontmenica (u dijalektu bi se moralo reć „kapo“, a kako je ženska onda bi to bila „kapica“, a to baš nekako ni lipo) Ivana Perpićka, ovo in je bilo dost za njev „ego“ (ča je taj „ego“, ne znamo, pitali i babu Francu - ni una ne zna), da vididu da moredu, al sadaj tek treba zapet – veli una. Trenirat, uozbiljit se, odreć se „treniranja“ u nekin disciplinami ke sa športon nemadu blede veze, treba se i osnovat, udruga za prvu ruku, prijavit se unda u nekakov savez, ma ima posla i vratru – veli una , odmanu rukon, dignu rep i – ode.
Eto, tako van je to s teškin kategorijami kad je ženski svit u pitanju.
M. Kranjčević
PRINT